Sesorah ( Mufangatipun Taneman Rosella Abrit)

Mufangatipun Taneman Rosella Abrit

Assalamualaikum wr...wb...

Bapak saha ibu ingkang kinurmatan, sarta kadang mudha wredha ingkang kula tresnani.

Mangga sesarengan ngaturaken pudya pudyastuti wonten ing ngarsaning pangeran ingkang Maha Agung ingkang sampun paring taufik lan hidayah, katandha kula lan panjenengan sami taksih pinaringan kasugengan saengga saged makempal wonten ing ngriki kanti boten wonten alangan satunggal menapa.

Bapak saha ibu ingkang kinurmatan,

Wonten ing kalodhangan menika, kula badhe ngandharaken babagan “Mufangatipun Taneman Rosella Abrit”. Taneman Rosella inggih menika spesies sekar ingkang asalipun saking benua Afrika. Wiwitanipun sekar rosella menika namung kangge taneman hias wonten ing griya-griya, ananging sakmenika sampun sumrambah dene taneman rosella menika saged kangge obat utawi bahan pangan lan omben. Taneman Rosella menika nggadhahi kasiyat lan faedah kangge kasarasaning badan. Kasunyatan sedaya perangan taneman menika saged migunani kangge njagi kasarasaning awak. Salah sawijining taneman rosella ingkang sampun dipunsumurupi dening masarakat kathah inggih menika rosella abrit. Rosella abrit (Hibiscus Sabdariffa) inggih menika anggota kulawarga Hibiscus ingkang saged ngasilaken serat karung lan Hibiscus rosanensis ingkang lumrah dipunsebat sekar sepatu.

Rosella abrit menika nggadhahi kasiyat kangge ngawekani maneka warna penyakit wiwit kanker ngantos lemah syahwat. Caranipun gampil, cekap ngunjuk asil olahanipun kadosta sirup rosella abrit lan teh rosella abrit. Kajawi kangge obat, sekar rosella abang ugi dipunginakaken kangge bahan pangan lan omben. Perangan taneman ingkang saged dipunproses kangge produk pangan inggih menika kelopak (angkup) sekaripun. Angkup sekar taneman menika ngandhut toya, sarta kathah kandhutanipun vitamin A lan C, ugi asam amino. Angkup sekar rosella menika biyasanipun dipunginakaken kangge jeli, saus, teh, sirup lan manisan.

Miturut cara tradisional, taneman menika kathah dipunmufangataken kangge nambani lara watuk, kesel, ngelu, lan gusi getihen. Saripati kuncup sekar rosella ugi dipunpitados saged kangge nahan kejang-kejang, anti cacing lan anti bakteri. Khasiyat liyane saking herba menika kadosta antiseptik, ngawekani lemah sahwat, lan ngedhunaken kadar serapan alkohol.

Cekap semanten ingkang saged kula aturaken, mugi-mugi wonten pigunanipun tuwin mufangatipun kagem panjenengan sedaya. Menawi ingkang kula aturaken mboten mranani ing penggalih panjenengan sedaya, kula nyuwun agunging samudra pangaksami. Nuwun...nuwun...nuwun

Wassalamualaikum wr....wb