Upacara
Labuh Tandur Dhusun Padasan
Sanak kadang acara tani ing dhusun
Padasan, desa Pakem Binangunan, Kecamatan Pakem, Kabupaten Sleman, ngadani
satunggaling upacara saderengipun miwiti tanem pantun. Nanem pantun boten
namung satunggaling kridha ingkang dipunlampahi saben mangsa tanem. Kangge
miwiti mangsa tanem, kadang tani nglampahi maneka cawisan, antawisipun ngluku,
ngarit, sarta ngadani upacara wilujengan labuh tandur.
Wilujengan labuh tandur, mujudaken
satunggaling upacara kangge miwiti tanem pantun, ngiras kangge nyuwun
kawilujengan dhumateng Gusti ingkang Hakarya jagat, supados kridhaning olah
tetanen rancag, kalis saking paneraking ama, lan kasil panenipun maremaken.
Upacara labuh tandur ingkang sampun awis-awis dipunlampahi dening kadang tani,
samangke wiwit dipungrengsengaken malih, mliginipun para kadang tani ing
wewengkon Ngayogyakarta.
Lampahing upacara ugi
dipunjumbuhaken kaliyan lampah adat saben wewengkon. Dene tata cara lan
ubarampe ingkang dipuncawisaken boten kados ingkang dipunlampahi dening sesepuh
ing jaman kawuri, namung dipunpendhet baku kemawon. Saderengipun upacara
kawiwitan, kadang tani nyawisaken ubarampe, sekul tumpeng, ingkung, lan
tumbasan peken. Dene tumrap kadang tani ing dhusun Padasan, kawimbuhan ubarampe
mligi, inggih punika jenang sumsum. Jenang sumsum mengku werdi kangge mulihaken
otot bebayu kadang tani sesampunipun mangsa panen, supados samekta olah tetanen
malih.
Salebeting upacara kasebut, ugi
dipuncawisaken ubarampe piranti olah tetanen, ingkang nggambaraken
manunggalipun manungsa kaliyan alam, sarta pralambang takwa dhumateng Gusti
ingkang Hakrya jagat. Sedaya ubarampe wau lajeng dipunkirab tumuju sabin,
kangge mbiwarakaken lampahing upacara labuh tandur. Sadumuginipun dhateng
sabin, sedaya ubarampe dipunpapanaken dhateng pojokan sabin, dene sekawan pincuk
jenang sumsum dipunpapanaken dhateng pojokan sabin, minangka tolak bala.
Sumber : LKS Muatan Lokal Bahasa Jawa SMA kelas X Semester Gasal
Tidak ada komentar:
Posting Komentar